परीक्षा आणि उत्सव यात खुप साध्यम्र्य आहे.
    माझ्या या विधानाचं तुम्हाला आश्चर्य वाटलं असेल , पण मी जरा समजावून सांगतो.
       उत्सवांचे आपल्यालाच खुप आधीपासून वेध लागतात . ते कधी येणार याची आपण वाट बघत असतो. होळी , दिवाळी , ईद , ख्रिसमस आणि गुरु पूरब यासारखे सण कधी एकदा येतात याकडे तुमचं लक्ष असतं याची मला खात्री आहे . त्याचप्रमाणे तुम्ही परिक्षेसाठीपण कित्येक महिने आधीपासून तयारी करता आणि त्यानुसार नियोजन करता की नाही?
      उत्सव आपल्यातील सद्गुण व्यक्त करण्याची संधी देतात. परीक्षा पण तुमच्यातील जे उत्तम असेल, ते व्यक्त करून देण्यासाठीच असतात . तुम्ही वर्षभर प्राप्त केलेले ज्ञान आणि केलेला अभ्यास यांच्यामुळे तुम्ही सुसज्ज होता .
सर्वांनी एकत्र येऊन उत्सव साजरा करण्यातच खरी मजा . जेवढ्या जास्त लोकांसमवेत तुम्ही उत्सव साजरे करता तेवढा तुमचा आनंद व्दिगुणित होतो.
    परीक्षेच्या उत्सवाचंही असंच असतं - तुम्ही एकटे कधी हा उत्सव साजरा करत नाही. अगदी काश्मिरपासून कन्याकुमारीपर्यंत आणि कच्छपासून कोहिमापर्यंत लाखो विद्यार्थी तुमच्याबरोबर परीक्षेच्या उत्सवात सहभागी होत असतात. तुमचे कुटुंबीय अन् तुमच्या मित्रांचाही तुम्हाला आधार असतो.
    उत्सवकाळात केलेली प्रार्थना अधिक फलदायी ठरते, अशी आपली श्रद्धा आहे. त्याचप्रमाणे परीक्षेपूर्वी आणि परीक्षेच्या काळात केलेला अभ्यासही अंगी लागतो.
   तुम्ही आता परीक्षांचा उत्सव साजरा करण्यास अधिक उत्साहाने आणि आनंदाने सज्ज झाला आहात , याची मला खात्री आहे.