मी राजकारणात का उतरले यामागचं खरं कारण हेच होतं की मला खरोखरच काही नकोय ,कुठलंही पद नकोय . होय , मी खरोखरच फक्त एक साधी गृहिणीच आहे . एक चांगली गृहिणीच सत्तेवर आल्यास जनतेच्या सुखदुःखाची खरी सोबती होऊ शकते . ती आधी एक गृहिणी असते . आई असते . कारण ती स्वतः कितीही हालअपेष्टा सहन करते ; पण आपल्याला सुख , समाधान देते . स्वतः उपाशी राहून मुलांना पोटभर खाऊ घालते . मुलांच्या आजारपणात , संकटकाळी रात्ररात्र जागत बसते. उपासतापास, नवससायास करते . त्यांच्यासाठी , त्यांची दुःखं दूर करण्यासाठी जे शक्य होईल ते ते करते . त्या बदल्यात तिची कसलीही अपेक्षा नसते . आईबाप , नवरा , सासूसासरे , मुलंबाळं त्यांच्यापैकी कुणाकडूनही कसली अपेक्षा नसते . तिला प्रेमाचे दोन शब्द पुरेसे असतात . तीच तर तिच्या झिजण्याची किंमत आहे . ज्योती बसू माझ्या सासऱ्यांसारखे आहेत . त्यांचं म्हणणं अगदी खरं आहे की मी फक्त एक गृहिणी आहे . गृहिणी ,जी घरादाराला नीट सांभाळते . तिचं गृहिणी देशही उत्तमप्रकारे सांभाळू शकते . कारण एका गृहिणीची योग्यता ठरते ते तिच्या प्रेम , त्याग , ममता , दुसऱ्याचं दुःख दूर करणं , सगळ्यांना सुखात ठेवणं आणि त्यांचे दु: ख , त्रास स्वतः कडे घेणं या गोष्टींवरून आणि खरोखरच मी एका गृहिणीपेक्षा अधिक काहीच नाहीये .......