कविता महाजन या मराठी साहित्याच्या समकालीन काळातील एक महत्त्वाच्या लेखिका आहेत. त्यांची स्त्रीकेंद्री भूमिका, वास्तववादी आशय व थेट- प्रयोगशील शैलीमुळे त्या मराठीतील आघाडीच्या लेखिका म्हणून सर्वपरिचित आहेत. त्यांच्या 'ब्र' कादंबरीनंतरची 'भिन्न' ही कालानुक्रमे दुसरी कादंबरी आहे. वर्तमानकालीन जनसमूहाचे वास्तववादी चित्रण हा या कादंबरीचा मुख्य विषय आहे. मानवतावादी दृष्टिकोनावर व उच्च नवमूल्यांवर आधारलेली ही कादंबरी मराठी कादंबरीच्या वाटचालीतील एक वेगळी व अंतर्मुख करायला लावणारी साहित्यकृती आहे. प्राचीन काळापासून माणसा- माणसांमध्ये जात- धर्म, रंगभेद- आर्थिकभेद, स्त्री- पुरुष लिंगभेद, श्रेष्ठ- कनिष्ठ असे विविध संघर्ष कधी उघड तर कधी छुप्या पद्धतीने चालत आलेले आहेत. मानवी इतिहासातील असे चिरंतन संघर्ष 'भिन्न' या कादंबरीचे मध्यवर्ती आशयसूत्र आहे. त्यामुळे एकीकडे चिंतनशील तर दुसरीकडे समस्याप्रधान असे या कादंबरीचे स्वरुप आहे. अर्थात कादंबरीतील एड्सग्रस्त स्त्रियांची समस्या ही येथे निमित्तमात्र असून, वर्तमानकालीन स्त्रियांच्या 'नवं समस्या व नवं आयुधे' यांचा चिंतनात्मक पातळीवर कलात्मक शोध यात घेतला आहे.