साहस करणे हे सर्वांनाच जमते असे नाही. धाडसी, साहसी मंडळी अशा कामगिरीच्या शोधातच असतात. पण सामान्य माणसाच्या अंगीही साहसी वृत्ती असते हे विजय देवधर यांनी लिहिलेल्या साहसी कथांमधून दिसते. 'कथा साहसवीरांच्या'मध्ये साक्षात मृत्यू समोर उभा राहिला असताना तरुण, मुले, महिलांनी त्याच्याशी सामना करून विजय कसा मिळवला याच्या रोमांचकारी सत्यकथा आहेत.

स्किईंग प्रशिक्षक असलेले अॅल व नॅन्सी त्यांच्या मुलांना घेऊन सहलीवर गेल्यावर अचानक अस्वलाचा हल्ला त्यांच्यावर झाला. बलाढ्य अस्वलाचा प्रतिकार करण्याची शक्ती नॅन्सीमध्ये येते व संपूर्ण ऑस्क्लीस कुटुंब या जीवघेण्या घटनेतून बचावतात. हेर समजून पकडलेल्या पूर्व जर्मनीतील युद्धकैद्याची रशियन सैन्याच्या पोलादी पकडीतून अनपेक्षित सुटका होते.

ओकोहोमातील सील किल्ल्यावरून हॉट एअर बलूनमधून तरंगत युद्धाची तयारी नजरेखालून घालताना जॉन ख्रिस्तियन व त्यांच्या सहकाऱ्याचा बलून हवेत भरकटतो. त्या वेळी जीव वाचविण्यासाठी त्यांनी केलेली पराकाष्ठा वाचताना अंगावर रोमांच उभे राहतात. प्रसंगावधान, धाडस, जगण्याची इच्छाशक्ती यांच्या जोरावर मृत्यूला परतवून लावणाऱ्या साहसवीरांच्या सोळा कथा यात आहेत.