श्रीगुरुदेव दत्त ! असं ज्यांना म्हटलं जातं, ते श्रीदत्तात्रेय आणि सदगुरुतत्त्व ह्यांच्यात वास्तविक कुठलाच भेद नाही. निर्गुण निराकार असणारे दत्तात्रेय भक्तांच्या उद्धारासाठी सगुणात येतात आणि आकार धारण करतात. त्यामुळे प्रत्येक सदेह सद्गुरु हा श्रीदत्तात्रेयांचाच अवतार असतो. निर्गुण-सगुणातलं हे अभिन्नत्व वाचकाला ‘श्रीगुरुस्तुति’ ह्या स्तोत्रातून समजून घेता येतं आणि निर्गुण दत्तात्रेयांच्या २९ गुणवैशिष्ट्यांचं वर्णन करणारं ‘श्रीदत्तात्रेयस्तोत्र’ अनुभवताना ते निर्गुणत्व आपल्या मनात सगुण रूपात साकारतं. सद्गुरु आणि दत्तात्रेयांचं अद्वैत सांगणारी प.प. टेंबे स्वामीमहाराजांची ही दोन्ही स्तोत्रं आणि त्यावरील सद्गुरूंनी केलेलं ‘सार्थ आत्मानुभूतीपूर्ण’ विवरण अभ्यासू आणि जिज्ञासू वाचकाला ‘भक्ती कशी करावी’ हे शिकवत ‘आत्मसाक्षात्काराचा’ जवळचा आणि सोयीचा रस्ता दाखवतात. ज्ञानाने परिपूर्ण अशी ही दोन्ही पुस्तकं वाचकांच्या विचारांमध्ये, वृत्तीमध्ये आणि पर्यायाने जीवनामध्ये अमुलाग्र बदल घडवण्यास निश्चित सहाय्यभूत होतील, ह्यात शंकाच नाही.