लहान मुलांमध्ये सामान्यतः दिसणार्‍या विकारलक्षणांच्या अनुरोधाने या पुस्तकाची मांडणी केलेली आहे शरीरातील बहुतेक सर्व इंद्रियांच्या विकारलक्षणांचा ऊहापोह येथे केला आहे. प्रारंभी इंद्रियांच्या कार्याची प्राकृतिक रूपरेषा येथे मांडली आहे. विकारलक्षणांची कारणे, डॉक्टरांच्या तपासणीची पद्धत, विविध चाचण्या व शेवटी उपाययोजना याप्रमाणे प्रत्येक लक्षणाचा परामर्श घेतला आहे. विकारांच्या कारणांचा शास्त्रीय पद्धतीने शोध घेऊन निदान निश्र्चित केल्यावर उपाययोजना करणे हे पाश्र्चात्य वैद्यकाचे वैशिष्ट्ये. निदान निश्र्चितीकरणाची डॉक्टरची मानसिक प्रक्रिया रुग्णाला कळणे, प्रस्तुत लेखकाच्या मते, आवश्यक आहे. एकदा डॉक्टरकडे गेल्यावर रुग्णाने त्याच्यावर विश्र्वास ठेवणे जरूर आहे. विश्र्वासाचे रूपांतर अंधश्रद्धेत चटकन होते. यासाठी उपाययोजना शास्त्रीय दृष्टीने व योग्य त्या दिशेने होत आहे, यासाठी डॉक्टरने प्रयत्न केले पाहिजेत व तशी रुग्णाची खात्री पटवली पाहिजे. प्रस्तुत पुस्तकाच्या मदतीने हे पालकांना समजावे.
प्रस्तुत पुस्तक वाचनात आल्यास बालआरोग्य व बालरोग या दोहोंविषयी वाचक-पालकांना, संपूर्ण जरी नाही, तरी योग्य मार्गदर्शन मिळेल अशी खात्री वाटते.