‘आरोग्य दर्पण’ या दिवाळी अंकाचे यंदाचे अकरावे वर्ष असून, आरोग्याला वाहिलेला हा अंक आहे. प्रारंभी श्रीकांत ना. कुलकर्णी, सदानंद चांदेकर यांच्या विनोदी आरोग्य कथा वाचकांना पुरेपूर हसायला लावून वाचकांच्या आरोग्याची काळजी घेतात. त्यानंतरच्या ‘संधिवात विशेषांका’त संधिवाताचे वेगवेगळे आजार, वेदना आणि त्यांचा करावा लागणारा सामना, त्यावरील आयुर्वेदीय औषधे, व्यायाम, आहार, योगोपचार आदींची सविस्तर अभ्यासपूर्ण माहिती तज्ज्ञ डॉ. श्रीकांत वाघ यांनी दिली आहे. डॉ. सुजाता उपाध्ये यांनी औषध, आहार आणि विश्रांती ही त्रिसूत्री पाळली तर ‘बरं होणं शक्य आहे’ या लेखातून रुग्णांना एक प्रकारचा दिलासाच दिला आहे.

त्यानंतर ‘ज्येष्ठ नागरिकांचे आरोग्य’ या लेखात आयुर्वेदाचार्य ब. ल. वष्ट यांनी ज्येष्ठांचा आहार आणि अध्यात्म, व्यायाम, कार्यक्षमतेसाठी विश्रांती आणि झोप आदीविषयी परिपूर्ण माहिती दिली आहे. डॉ. न. स. फडके यांनी बारा राशींचे आजार आणि त्यांचे आरोग्यविषयक भविष्य याची सविस्तर मांडणी केली आहे. यातील वसंत मयेकर यांची व्यंगचित्रे ‘हसणे हे आरोग्याचे औषध आहे’ याचा अनुभव वाचकांना देतात, तर पुंडलिक वझे यांची विनोदी चित्रेही छान आहेत. वाचकांना नक्कीच उपयुक्त ठरेल असा हा दिवाळी अंक संग्रही ठेवावा असाच आहे.