Summary of the Book
व्यवसायाने करसल्लागार असलेल्या अरुण गोडबोले यांनी सातारा जिल्ह्यावर लिहिलेले 'सातारा: स्मरणयात्रा' हे पुस्तक. या पुस्तकाच्या माध्यमातून मूळचे कोकणातील असलेले गोडबोले सातारामध्ये येऊन कसे स्थायिक झाले आणि सातारच्या भूमीत कसे मिसळून गेले याचे अनेकांना आश्चर्य वाटते. लोकांना वाटणा-या आश्चर्यातूनच पुस्तक लिहिण्याची प्रेरणा मिळाल्याचे लेखक सांगतात...
या पुस्तकात गोडबोले घराण्याचा इतिहास उलगडला आहे. त्याचप्रमाणे या पुस्तकाच्या माध्यमातून सातारा शहरासंदर्भातील जुन्या आठवणींचे डॉक्युमेंटेशनही झाले आहे. सातारा शहरातील न्यू इंग्लिश शाळा, भिडे गुरुजी व्यायाममंदिर, सातारचे टांगे आणि टांगेवाले, इथली वाचनसंस्कृती, आयुर्वेदीय अर्कशाळा, गोंदवलेकरमहाराज, हे वाचताना सातारा शहरातील जुन्या पाऊलखुणा निश्चितपणे सापडतात. जे मूळ सातारचे आहेत त्यांना हे पुस्तक जुन्या सातारा शहराची आठवण निश्चितच करून देणारे आहे. गोडबोले यांची सहज, सोपी ओघवती भाषा यामुळे हे पुस्तक वाचताना कंटाळा येत नाही. उलट सातारा परिसराचा हा समृद्ध इतिहास वाचकाच्या ज्ञानात भर घालतो.