आपली प्रगती होण्यास मुख्य अडथळा म्हणजे आळस. आळस हा माणसाचा शत्रू आहे, असं आजवर ऐकत आलो आहे. ते खरेही आहे; पण आळसावर मात कशी करायची असं सांगणारं कदाचित हे पहिलंच पुस्तक असावं. लेखक ह. अ. भावे यांनी आळसाला पळवून लावण्यासाठी काय करावं, याचं मार्गदर्शन केलं आहे. पहाटे उठून नामस्मरण करण्याचा उपयोग होतो, असं ते सांगतात. आळशी माणसांना कष्ट करून धनसंचय करण्याऐवजी झटपट पैसा हवा असतो. ज्यांना आयतं धन हवं असतं, ते लोक लॉटरी, रेसच्या मागे लागतात; पण श्रम न करता मिळालेला पैसा हा टिकणारा नसतो, असं लेखक म्हणतात. त्यासंबंधात ते काही उदाहरणही देतात.