Summary of the Book
विश्वाच्या कणाकणाशी
एकरूप माझा प्राण आहे ,
पसायदानवादी उरलो मी
हेच याचे प्रमाण ||
ज्ञानदेवाचा आहे रेडा मी
तुकोबाची माळ आहे ,
गोरोबाचे चाक अन्
कान्होपात्राचे चाळ आहे ,
नरहरीच्या ऐरणाचे
अजूनही मला भान आहे ,
पसायदानवादी उरलो मी
हेच याचे प्रमाण आहे ||
निळोबाची ओढ गुरूची
जनाबाईचे दास्यत्व आहे ,
नामयाची आहे पताका नि
पुंडलिकाचे भक्तत्व आहे ,
शेख मुहम्मद , सोपानकाका
दोन्ही मला समान आहे ,
पसायदानवादी उरलो मी
हेच याचे प्रमाण आहे ||
एकाच्या भारूडातील पात्र
चोखोबाची जात आहे ,
सेनाचा आहे वस्तरा अन्
सावताची मी पात आहे ,
मुक्तीईला कलियुगातही
ताटीचे जसे भान आहे ,
पसायदानवादी उरलो मी
हेच याचे प्रमाण आहे ||
आळंदीचा सुवर्णपिंपळ
भिवरेची वाळू आहे ,
नसानसांतून भिनलेला
विठ्ठल माझा कनवाळू आहे ,
निवृत्ती , ज्ञाना , विसोबाचे
पंथ सारेच समान आहे ,
पसायदानवादी उरलो मी
हेच याचे प्रमाण आहे ||