"Science is an ongoing process. It never ends." - Dr. Carl Sagam
या विश्वाच्या अथांग सागराच्या किनार्‍यावर आपल्या पाऊलखुणा उमटवत माणसाने आपला प्रवास सुरू केला अन् त्याच प्रवासात त्याला ह्या विश्वाचे रहस्य खुणावू लागले... विश्वसागराची गाज बोलवू लागली. आपल्या पाऊलखुणांचा मागोवा घेण्यासाठी त्याने ह्या सागरात आपले पाय हळूच भिजवले, तेव्हा त्याला त्याच्या गतकाळाची, इतिहासाची साद ऐकू आली. ही साद ऐकत असताना त्याने जो प्रवास सुरू केला, त्यात त्याला एक साथीदार गवसला... मित्र मिळाला...
हा मित्र कसा आहे ? मित्र जसा असावा तसा आहे ! खर्‍याला खरे म्हणणारा अन् खोट्याला खोटे ! धर्म, जातपात, भाषा, राष्ट्र, अधिकार, मान-सन्मान, स्थान ह्या कशाकशाचीही पर्वा न करणारा, केवळ सत्य तेच सांगणारा अन् सांगता सांगता, माणसाच्या बोटाला धरून पुढे नेणारा... - अंतरिक्षाचा वेध घेण्यासाठी सज्ज करणारा ! ह्या मित्राचे नाव आहे विज्ञान ! जसा हा विश्वसागर अथांग तसाच ह्या मित्राच्या मनाचा विस्तारही अथांग ! त्याला जेवढे समजावून घ्यायचा प्रयत्न करावा, तेवढा तो अनाकलनीय भासतो... जेवढे त्याच्या जवळ जावे, तेवढा त्याचा सहवास आवडू लागतो ! ह्या विज्ञानाच्या साथीने, ज्ञानाच्या संगतीने ज्या विश्वसागरात माणसाने उडी टाकली आहे,त्या विश्वसागराचे दुसरे नाव आहे अंतरिक्ष !! स्थलकालाच्या ह्या अफाट पसार्‍यात अंतरिक्षाचा वेध घेता घेता, माणसाला स्वत:चीच ओळख अधिक पटू लागली आहे. जडाने धारण केलेल्या चैतन्याचा हा प्रवास शब्दांत रेखताना जो विलक्षण आनंद झाला, तो ह्या पुस्तकातून व्यक्त करण्याचा हा प्रामाणिक प्रयत्न आहे.