Summary of the Book
संतोष अरविंदेकर यांनी लिहिलेली ही आत्मकथा राज्य परिवहन सेवेतील अनेक अनुभव सांगणारी आहे. "एसटी' विभागात 12 वर्षांपेक्षा जास्त काळ घालवलेले संतोष अरविंदेकर सध्या पस्तिशीत आहेत. खरे तर हे वय आत्मकथा लिहिण्याचे नाही. कंडक्टर म्हणून काम करणार्या संतोष यांच्याकडून भावनेच्या भरात एक चूक घडली ती त्याना दु:खाच्या खाईत ढकलणारी ठरली. खरे तर आजच्या भ्रष्टाचाराच्या कोटी कोटी आकड्याच्या प्रकरणांमध्ये संतोष यांनी केलेली चूक तशी किरकोळ मानावी लागेल. पण त्याच्याकडून चूक घडली हे सत्य. अर्थात ते त्यांनी नाकारलेले नाही उलट त्यांनी चूक कबूल करून आपल्याला पुन्हा एकदा कामाची संधी द्यावी, अशी विनंतीच या आत्मकथनात आहे. चूक कबूल करायला खूप मोठे धैर्य लागते ते धैर्य संतोष यांच्याकडे आहे. पहिलेच पुस्तक असूनही संतोष यांच्या लेखनात कच्चेपणा जाणवत नाही. ओघवती भाषा आणि निवेदनातील सच्चेपणा वाचकाला नक्की भावेल.