मरण ही आयुष्यातील अटळ व निश्चित गोष्ट आहे. सुखाने मरण येणे हे भाग्याचे समजले जाते. पण मृत व्यक्तीच्या मागे मालमत्ता वाटणीवरून कुटुंबियांमध्ये, नातेवाईकांच्यात जे वाद सुरु होतात, त्यातून नातेसंबंधात कायमची कटुता येते. हे टाळण्यासाठी मृत्युपत्र करणे आवश्यक ठरते.

याविषयी अरुण गोडबोले यांनी 'मृत्यूपत्र गरज आणि मार्गदर्शन'मधून माहीती दिली आहे. मृत्यूपत्र म्हणजे काय, त्याचा इतिहास सांगून मृत्यूपत्रातील वारस अथवा मृत्यूपत्र केलेले नसल्यास मृत व्यक्तींची संपत्ती कोणाला मिळू शकते, हिंदू वारस कायदा, मृत्यूपत्र करून ठेवण्यमागची कारणीमीमांसा, मृत्यूपत्र कोण करू शकतो, ते केव्हा करावे, मृत्यूपत्राची तयारी, ते कसे करावे, त्याची नोंदणी, मृत्यूपत्र रद्द करून नवीन करणे, बदल व पुरवणीपत्र, व्यवस्थापक, प्रशासन दाखला, प्रशासनाधिकारपत्र, मृत्यूपत्राचा अन्वयार्थ कसा लावतात.,

मृत्यूपत्र अवैध ठरवण्यामागची कारणे, मृत्यूपत्रासंबंधी अन्य माहीती, योग्य सल्ल्याची गरज आदी सर्व माहीती सविस्तर व अगदी अल्पशिक्षीतालाही समजेल अशा सुलभ मराठीत दिली आहे. मृत्यूपत्राचे नमुनेही दिले असून, कायद्यातील तरतुदी नीट समजण्यासाठी व्यवहारातील उदाहरणे दिली आहे.