ज्येष्ठ लेखक, संशोधक, अभ्यासक रा. चिं. ढेरे यांच्या सिद्धहस्त लेखणीतून उतरलेला हा ग्रंथ आहे. ईश्वर, संस्कृती, समाज या तिन्ही धाग्यांच्या साह्याने विणलेले हे संशोधन आहे. वेंकटेश्वर आणि कालहस्तीश्वर हे दोन आंध्रप्रदेशातील देव हे दोन्ही लोकदेव आहेत. वेंकटेशाचे महाराष्ट्राशीही नाते आहे.

या नात्याचा शोध डॉ. ढेरे यांनी घेतला आहे. आंतरभारतीय, विशेषता: दक्षिण भारतीय सांस्कृतिक अनुबंधाच्या दृष्टीने तो महत्वपूर्ण आहे. वेंकटेशाने महाराष्ट्र आणि दक्षिण भारत यांच्यामध्ये सांस्कृतिक सेतूबंध निर्माण केले आहेत. उभय राज्यांतील सांस्कृतिक भावबंध, सांस्कृतिक महासमन्वयाचा शोध डॉ. ढेरे यांनी घेतला आहे. तो मुळापासून वाचणेच योग्य..

तिरुपती बालाजी हे जगातील सर्वांत श्रीमंत देवस्थान समजले जाते. बालाजी उर्फ व्यंकटेश हे दैवत फक्त दक्षिण भारतापुरते मर्यादित न राहता देशभरातच त्याचे भाविक आहेत. महाराष्ट्रात विठ्ठलाच्या बरोबरीने बालाजी पूजनीय आहे. अनेक ठिकाणी त्याची मंदिरे आहेत.

यातील निवडक ठिकाणांचा परिचय रा. चिं. ढेरे यांनी श्रीवेंकटेश्वर आणि श्रीकालहस्तीश्वर या संशोधनात्मक ग्रंथातून करून दिला आहे. व्यंकटेश्वराचा सखा असलेल्या श्रीकालहस्तीश्वराची महती यात आहे. बालाजी या लोकप्रिय देवतेमुळे दक्षिण भारत व महाराष्ट्र यामध्ये निर्माण झालेले सांस्कृतिक बंध यात उलगडले आहेत.