डॉ. शिरीष पवार यांनी लिहिलेल्या या पुस्तकात शाहू महाराजांच्या कार्याची ओळख करून देण्यात आली आहे. "जातिअंताच्या लढ्यातील योद्धा' या प्रकरणात शाहू महाराजांनी वेगवेगळे प्रयत्न करून जातिनिर्मूलन केले त्याची माहिती मिळते. मागासवर्गातील विविध तरुणांना आपल्या नोकरीत ठेवून त्यांचा मान वाढविला. शाहू महाराजांनी सामाजिक समतेसाठी विविध प्रयोग केले, त्याची माहिती या पुस्तकात सविस्तरपणे दिली आहे. शाहू महाराजांनी आपल्या संस्थानात शिक्षण संस्था व उद्योगांना कसे उत्तेजन दिले, या सगळ्यांची माहिती या पुस्तकातून मिळते. कुलकर्णी वतन रद्द करण्याचा त्यांचा महत्त्वाचा निर्णय, तसेच आंतरजातीय विवाहाला प्रोत्साहन, यासारखे अनेक महत्त्वाचे निर्णय त्यांनी घेतले होते. वेदोक्त प्रकरण आणि शाहू महाराज यांची भूमिका नेमकी काय होती, याचाही तपशील या चरित्रामध्ये मिळतो. शाहू महाराजांचे कार्य किती मोठे आणि त्यांचे निर्णय किती दूरद्रष्टेपणाचे होते, याचा तपशील यातील विविध प्रकरणांमधून समजतो.