पूर्व युरोपामधील लिथुनियात आजीसोबत राहणाऱ्या सात वर्षांच्या अॅनेटने पहिल्या महायुद्धाचे चटके सहन केले होते. कौर्य, भय, अनिश्चिती, असहाय्यता अशा वातावरणातही आजीने तिला निसर्ग वाचायला, पशुपक्ष्यांची मैत्री करण्यास शिकविले.

घरगुती, पण नैसर्गिक साधनांच्या मदतीने आरोग्य सेवा करण्याचे धडे दिले. मेंढीच्या दुधाचे फायदे, उबदार लोकरीचा उपयोग शरीर तंदुरुस्तीसाठी कसा होतो, जखमा भरण्यासाठी चिखल, माती, गवत याचा कसा वापर करायचा हे सांगितले. आजीचे प्रेम व शिकवणूक याच्या पाठबळावरच डॉ. अॅन विग्मोर यांनी अमेरिकेत वडिलांकडून होणारा छळ सोसला, पतीच्या जाचातून सुटका करून घेतली.

धर्माचा अभ्यास करीत असताना शारीरिक व्याधींबरोबरच रुग्णाच्या मनाकडे लक्ष देणे आवश्यक असल्याने त्यांनी आरोग्य सुधारण्यासाठी निसर्गात मुबलक आढळणाऱ्या तणांवर संशोधन केले त्यातूनच गव्हांकुराच्या रसाचा शोध लागला. माणसांच्या आणि प्राण्यांच्या व्याधींवर त्यांनी याद्वारे उपचार सुरु केले. या यशस्वी प्रयोगाची कहाणी डॉ. अॅन यांनी 'व्हाय सफर ?'मधून कथन केली आहे. त्याचा मराठी अनुवाद डॉ. विजया साठे यांनी केला आहे.