आझाद हिंद सेनेची स्थापना करून भारताच्या स्वातंत्र्यासाठी लढणारे नेताजी सुभाषचंद्र बोस यांचा मृत्यू हे भारतातील सर्वात मोठे रहस्य मानावे लागेल. १९४५ मध्ये विमान अपघातात त्यांचे निधन झाल्याचे सांगण्यात येते. मात्र, नेताजींचा मृत्यू कसा झाला, याबाबत अद्याप चर्चा होते. त्यामुळे नेताजींबाबत नक्की काय झाले हे शोधण्याचा प्रयत्न पत्रकार अनुज धर यांनी केला.

दहा वर्षे यावर संधाधन करून त्यांनी काढलेले निष्कर्ष 'नेताजींच्या मृत्यूचे गूढ...'मधून मांडले आहेत. भारताच्या स्वातंत्र्यासाठी नेताजींनी रशियाला साद घातली होती; पण त्यांच्याकडून फारसा प्रतिसाद मिळाला नाही. नेताजींच्या मृत्युमागे रशियाचे हात आहे का, यावर चर्चा केली आहे.

तत्कालीन पंतप्रधान पंडित नेहरु यांचा पत्रव्यवहार, यामागील सत्यशोधण्यासाठी स्थापन झालेली मुखर्जी समिती व तिचे निष्कर्ष, विमानप्रवासात हबीबूर रेहमान यांचा जवाब, फैजाबाद येथे प्रकट झालेले भगवानजी यांचे नेताजींशी असलेले साधर्म्य, विविध लोकांच्या मुलाखती, कागदपत्रे या सर्वांचा अभ्यास करून नेताजींच्या मृत्यूचे गूढ उकलण्याचा प्रयत्न यात केला आहे. याचा मराठी अनुवाद डी. मीना शेटे - संभू यांनी केला आहे.