‘तिरपीट’ या कथा संग्रहातील कथांमधील घटना, प्रसंग निरनिराळे असले तरी त्यांतील सारी पात्रे विभिन्न भाषिक आहेत. ती मध्यमवर्गीय असून एका बॅंकेत कामाला आहेत. याच पात्रांपैकी एक पात्र म्हणजे मेरवान फताटवाला !

हा पारशी बावाजीदेखील प्रत्येक कथेत आहे. किंबहुना त्याच्याच भोवती कथा फिरत असते. पारशी असामीचे समस्त गुण फताटवाल्यात आहेत. तो प्रेमळ आहे, वेंधळा आहे. तो धांदरट आहे. तो उदार आहे तसाच कंजूषही आहे. तो मिष्किल आहे तसाच गांभीर्याचा आव आणणारा आहे. तो भोळसट असला तरी स्वत:चा आब राखणारा आहे.

अनेक प्रसंगांतून जाताना बॅंकेतील त्याचे इतर सहकारी – मिस्‌ मनसुखानी, कवठणकर, टी. सुब्रमण्यम्‌, मिस्‌ मीरचंदानी, डिक्रूझ, भेंडे, मनूभाय शहा आदि मंडळीही त्यात सामील झालेली असतात. आणि मग उडालेल्या गोंधळामुळे अभावितपणे का होईना एक तर फताटवाला तरी अडचणीत येतो किंवा त्याचे सहकारी तरी. त्याची फिरकी घेणाऱ्या इब्लिस कवठणकरचा प्रतिशोध तो फिरकीनेच घेतो.

मात्र ही सारीच पात्रे मनाने निर्मळ आहेत. आता कधीकधी त्यांच्या मनात परस्परांविषयी ‘तुझं माझं जमेना’ सारखे विचार येत असले तरी ‘तुझ्यावाचून करमेना’ सारख्या भावनाही उचंबळून येत असतात.

परस्परांच्या उचापतखोर स्वभावप्रकृतीतून उद्‌भवणाऱ्या घटनांमुळे त्यांची उडणारी ‘त्रेधा’ शब्दबद्ध करून वाचकांच्या रंजनासाठी सादर केलं जाणारं हे पुस्तक म्हणजेच ‘तिरपीट’!